चालु आवमा लक्ष्यअनुसार पुल निर्माण हुने

भौतिक पुर्वाधार

गृहपृष्ठ
भौतिक पुर्वाधार

चालु आवमा लक्ष्यअनुसार पुल निर्माण हुने

सामाजिक सञ्चार मंगलबार, जेठ १६, २०८०

काठमाडौँ । विगतका वर्षहरुमा विभिन्न कारणले लक्ष्यभन्दा कम सङ्ख्यामा पुल निर्माण भए पनि चालु आर्थिक वर्षमा लक्ष्यअनुसार नै पुल निर्माण सम्पन्न हुने देखिएको छ ।

चालु आवमा कुल दुई सय ८० पुल निर्माणको लक्ष्य लिइएकोमा हालसम्म दुई सय ६५ पुल बनिसकेको र धेरै अन्तिम अवस्थामा रहेको विभागका महाशाखाका प्रमुख नरेशमान शाक्यले बताउनुभयो ।

कतिपय पुलहरु अन्तिम अवस्थामा रहेकाले तीनमा थप बजेट आएमा चालु आवमै सम्पन्न हुने उहाँले जानकारी दिनुभयो । उहाँले भन्नुभयो, “काम भइसकेको भए पनि भुक्तानी हुन बाँकी रहेकाले प्रगति राम्रो हुने देखिएको छ ।”

पुलका कतिपय भागको काम वर्षाको समयमा गर्न नमिल्ने हुँदा तत्काल रकम प्राप्त हुँदा मात्रै निर्माण सम्पन्न हुनसक्ने अवस्था रहेको महाशाखाले जनाएको छ ।

‘स्लाब कास्टिङ’ वर्षा पहिले गर्नुपर्ने र वर्षामा गर्दा बगाउने सम्भावना रहने उहाँले बताउनुभयो । उहाँले भन्नुभयो, “फाउन्डेसनको काम वर्षा पहिले सुरु गर्न सकिँदैन ।”

सरकारले चालु आवमा पुल निर्माणका लागि रु १० अर्ब ६३ करोड र पुलसम्बन्धी अध्ययनका लागि रु ६० करोड विनियोजन गरेको थियो । सङ्घीयता कार्यान्वयनमा आइसकेपछि स्थानीय पुल निर्माणको जिम्मेवारी स्थानीय तहको हुने भए पनि अहिलेसम्म सङ्घीय सरकारले पुल निर्माण गर्दै आएको छ ।
---
श्रोतः रासस

प्रकाशित मिति: मंगलबार, जेठ १६, २०८० १५:४२

प्रतिक्रिया दिनुहोस्