सार्वजनिक यातायात क्षेत्रको सुधारका लागि तीन तहका सरकारबीच समन्वय आवश्यक: विजयबहादुर स्वाँर

भौतिक पुर्वाधार

गृहपृष्ठ
भौतिक पुर्वाधार

सार्वजनिक यातायात क्षेत्रको सुधारका लागि तीन तहका सरकारबीच समन्वय आवश्यक: विजयबहादुर स्वाँर

सामाजिक सञ्चार मंगलबार, साउन १९, २०८३

नेपाल यातायात व्यवसायी राष्ट्रिय महासंघका पूर्वअध्यक्ष विजयबहादुर स्वाँरले सार्वजनिक यातायात क्षेत्रलाई व्यवस्थित बनाउन संघीय, प्रदेश र स्थानीय सरकारबीच नीतिगत समन्वय आवश्यक रहेको बताउनुभएको छ ।
सोमवार काठमाडौंमा आयोजित नेपाल यातायात व्यवसायी राष्ट्रिय महासंघ, वागमती प्रदेश समितिको सम्मान, पदस्थापन तथा प्रशिक्षण कार्यक्रममा बोल्दै उहाँले यस्तो बताउनुभएको हो पूर्वअध्यक्ष स्वाँरले तीन तहका सरकारबीच ऐन, नियम र कानून निर्माणमा एकरूपता नहुँदा यातायात क्षेत्रमा अन्योल र द्वन्द्व सिर्जना भएको बताउनु भयो ।

सरकारहरूबीच प्रभावकारी समन्वय भएमा मात्र सार्वजनिक यातायातमा गरिएको लगानी सुरक्षित हुने र यस क्षेत्रमा कार्यरत श्रमिकहरूको हकहित संरक्षण हुने उहाँको तर्क छ । कार्यक्रममा स्वाँरले यातायात श्रमिकहरूको सामाजिक सुरक्षाको विषयलाई प्राथमिकताका साथ उठाउनु भयो । महासंघले श्रमिकहरूको सामाजिक सुरक्षाका लागि त्रि–पक्षीय सम्झौता गरिसकेको स्मरण गराउँदै उहाँले यसलाई कानूनी रूपमै अनिवार्य बनाइनुपर्ने बताउनु भयो ।

उहाँले कुनैपनि यातायात कम्पनी वा समितिले सामाजिक सुरक्षामा जान इन्कार गर्न नमिल्ने र अटेर गरेमा कम्पनी नवीकरणमा समेत बाधा पुग्न सक्ने चेतावनी दिनुभयो ।
उहाँले भन्नुभयो, ‘संघीय सरकारले एउटा कानुन ल्याउने, प्रदेशले त्यसलाई नमान्ने र स्थानीय तहले कार्यान्वयन नगर्ने हो भने सार्वजनिक यातायात क्षेत्रमा थप भद्रगोल स्थिति पैदा हुन्छ । तसर्थ, तीनै तहका सरकारले कानून निर्माण गर्दा आपसमा समायोजन र समन्वय गर्न आवश्यक छ । कानूनले बाध्य पारेपछि मात्रै सुधार गर्ने प्रवृत्ति त्याग्नुपर्छ ।

समयसापेक्ष रूपमा हामी आफैँले सुधारका कदमहरू चाल्नुपर्छ । यात्री यातायात सेवा लिमिटेडले आफ्ना श्रमिकहरूलाई सामाजिक सुरक्षा कोषमा आवद्ध गराएर सकारात्मक उदाहरण प्रश्तुत गरिसकेको छ । अब अन्य व्यवसायीले पनि ढिलाइ नगरी आफ्नो दायित्व पूरा गर्नुपर्छ ।’
उहाँले व्यवसायीहरूले केवल सरकारलाई मात्र दोष दिएर आफ्नो जिम्मेवारीबाट पन्छिन नहुने बताउनु भयो । सार्वजनिक यातायातलाई मर्यादित र सुरक्षित बनाउन व्यवसायीहरू आफैँ जिम्मेवार बन्नुपर्नेमा उहाँको जोड छ । –न्युज एजेन्सी नेपाल

प्रकाशित मिति: मंगलबार, साउन १९, २०८३

प्रतिक्रिया दिनुहोस्