एल पासो, टेक्सास, अमेरिका, अक्टोबर २४, २०२६।.jpeg)
अमेरिकाको टेक्सास राज्यस्थित युनिभर्सिटी अफ टेक्सास एट एल पासो (UTEP) मा क्रियाशील नेपाली विद्यार्थी समाज (NSA-UTEP) ले नेपालीहरूको महान् चाड बडादशैँको अवसरमा शनिबार भव्य रूपमा दशैँ शुभकामना आदानप्रदान तथा सांस्कृतिक कार्यक्रम सम्पन्न गरेको छ।
विदेशी भूमिमा रहेर पनि नेपाली भाषा, कला, संस्कृति, परम्परा र मौलिक पहिचानको संरक्षण तथा प्रवर्द्धन गर्ने उद्देश्यले आयोजित उक्त कार्यक्रममा एल पासो तथा आसपासका क्षेत्रमा बसोबास गर्ने नेपाली विद्यार्थी, प्राध्यापक, अनुसन्धानकर्ता, विभिन्न पेसामा आबद्ध नेपाली समुदाय, नेपाली मूलका अमेरिकी सैनिक परिवार, बालबालिका तथा विदेशी अतिथिहरूको उल्लेखनीय उपस्थिति रहेको थियो।
नेपाली समुदायलाई सांस्कृतिक एकताको मालामा बाँध्दै आपसी सद्भाव, भाइचारा र आत्मीयता अभिवृद्धि गर्ने उद्देश्यले आयोजना गरिएको कार्यक्रमले विदेशमा पनि नेपालीपन र नेपाली संस्कृतिप्रतिको प्रेमलाई जीवन्त राख्न महत्त्वपूर्ण भूमिका खेलेको सहभागीहरूले बताएका थिए।
प्राध्यापक डा. पारस मण्डलको प्रमुख आतिथ्य
कार्यक्रममा युनिभर्सिटी अफ टेक्सास एट एल पासोको इलेक्ट्रिकल इन्जिनियरिङ विभागका प्राध्यापक तथा नेपाली विद्यार्थी समाजका सल्लाहकार प्रा. डा. पारस मण्डल प्रमुख अतिथिका रूपमा उपस्थित हुनुहुन्थ्यो।
कार्यक्रमलाई सम्बोधन गर्दै प्रमुख अतिथि डा. मण्डलले विदेशमा अध्ययन, अनुसन्धान तथा विभिन्न पेसामा संलग्न नेपालीहरूलाई एकताबद्ध बनाउन यस्ता सांस्कृतिक कार्यक्रमको विशेष महत्त्व रहने बताउनुभयो।
उहाँले नेपाली विद्यार्थी समाजले नेपाली समुदायबीच आपसी सहयोग, समन्वय र सांस्कृतिक सम्बन्ध विस्तारमा पुर्याउँदै आएको योगदानको प्रशंसा गर्नुभयो। विशेषगरी विद्यावारिधि (PhD) तथा उच्च शिक्षा अध्ययन गरिरहेका विद्यार्थीहरूलाई लक्षित गर्दै उहाँले अध्ययन र अनुसन्धानमा निरन्तर मेहनत, धैर्य, अनुशासन तथा आत्मविश्वासका साथ अगाडि बढ्न प्रेरणादायी मन्तव्य व्यक्त गर्नुभएको थियो।
विदेशमा हासिल गरेको ज्ञान, सीप र अनुभवलाई भविष्यमा समाज तथा राष्ट्रको हितमा उपयोग गर्न सकिने धारणा पनि उहाँले राख्नुभएको थियो।
अध्यक्ष राजकुमार गिरीद्वारा स्वागत तथा नेपाली पर्वहरूको परिचय
.jpeg)
कार्यक्रममा नेपाली विद्यार्थी समाज, युटेपका अध्यक्ष राजकुमार गिरी ले प्रमुख अतिथि, विशिष्ट अतिथि, प्राध्यापक, नेपाली समुदायका अग्रज व्यक्तित्व, विद्यार्थी, अमेरिकी सैनिक परिवार तथा सम्पूर्ण उपस्थित महानुभावहरूलाई स्वागत गर्दै दशैँको शुभकामना व्यक्त गर्नुभएको थियो।
अध्यक्ष गिरीले दशैँ नेपालीहरूको धार्मिक तथा सांस्कृतिक पर्व मात्र नभई पारिवारिक पुनर्मिलन, आपसी सद्भाव, एकता, सम्मान र आत्मीयताको प्रतीक भएको बताउनुभयो।
उहाँले कार्यक्रममा उपस्थित विदेशी अतिथिहरूलाई नेपालका प्रमुख चाडपर्व दशैँ, तिहार तथा छठको सांस्कृतिक र सामाजिक महत्त्वबारे जानकारी गराउनुभएको थियो। नेपाल बहुभाषिक, बहुधार्मिक र बहुसांस्कृतिक विविधताले सम्पन्न देश भएको उल्लेख गर्दै उहाँले यस्ता कार्यक्रममार्फत नेपाली कला, संस्कृति र परम्परालाई अन्तर्राष्ट्रिय समुदायमाझ परिचित गराउन सकिने धारणा राख्नुभयो।
उहाँले भन्नुभयो, “हामी भौगोलिक रूपमा नेपालबाट हजारौँ माइल टाढा भए पनि हाम्रो मन, भावना, संस्कृति र पहिचान सधैँ नेपालसँग जोडिएको छ। नेपाली विद्यार्थी समाज केवल विद्यार्थीहरूको संस्था मात्र नभई यहाँ रहेका सम्पूर्ण नेपाली समुदायलाई जोड्ने साझा मञ्चका रूपमा अगाडि बढिरहेको छ।”
विदेशमा अध्ययन, अनुसन्धान र कामको व्यस्तताबीच पनि नेपाली समुदायले देखाएको उत्साहजनक सहभागिताले आगामी दिनमा अझ धेरै सांस्कृतिक, सामाजिक तथा शैक्षिक कार्यक्रम आयोजना गर्न प्रेरणा मिलेको उहाँले बताउनुभयो।
सचिव दीपा सिलवालद्वारा कार्यक्रम सञ्चालन
कार्यक्रमको औपचारिक सञ्चालन नेपाली विद्यार्थी समाजकी सचिव दीपा सिलवाल ले गर्नुभएको थियो।
उहाँले उपस्थित सम्पूर्ण अतिथि तथा नेपाली समुदायलाई स्वागत गर्दै कार्यक्रमलाई व्यवस्थित, आकर्षक र सौहार्दपूर्ण ढङ्गले अगाडि बढाउनुभएको थियो। विभिन्न सांस्कृतिक प्रस्तुति, शुभकामना मन्तव्य तथा मनोरञ्जनात्मक गतिविधिहरूलाई क्रमबद्ध रूपमा सञ्चालन गर्दै उहाँले कार्यक्रमलाई थप जीवन्त बनाउन महत्त्वपूर्ण भूमिका निर्वाह गर्नुभएको थियो।
उपाध्यक्ष रामजी जैसी भुसालद्वारा कार्यक्रमको समन्वय
कार्यक्रमको समग्र समन्वय नेपाली विद्यार्थी समाजका उपाध्यक्ष रामजी जैसी भुसाल ले गर्नुभएको थियो।
उहाँले एल पासोमा बसोबास गर्ने युटेपका विद्यार्थी तथा विश्वविद्यालयबाहिर रहेका नेपाली परिवारहरूबीच सम्बन्ध विस्तार गर्न यस्ता कार्यक्रम अत्यन्त उपयोगी हुने बताउनुभयो।
उहाँका अनुसार नेपाली समुदायबीच आपसी चिनजान, सहयोग, सद्भाव र भावनात्मक सम्बन्धलाई बलियो बनाउनुका साथै नेपाली संस्कृति र परम्परालाई अन्तर्राष्ट्रिय मञ्चमा चिनाउन यस्ता कार्यक्रमले महत्त्वपूर्ण योगदान पुर्याउँछन्।
उहाँले आगामी दिनमा पनि विद्यार्थी, नेपाली परिवार तथा विभिन्न पेसामा आबद्ध समुदायलाई समेटेर यस्ता कार्यक्रमलाई निरन्तरता दिनुपर्ने आवश्यकता औँल्याउनुभयो।
सांस्कृतिक प्रस्तुतिले थप्यो उत्साह र रौनक
.jpeg)
कार्यक्रमको विशेष आकर्षण विभिन्न सांस्कृतिक नृत्य, मनोरञ्जनात्मक प्रस्तुति तथा सामूहिक रमाइलो गतिविधिहरू रहेका थिए।
नेपाली विद्यार्थी समाजकी कोषाध्यक्ष शोभा कुइँकेल ले विभिन्न मनोरञ्जनात्मक तथा सांस्कृतिक प्रस्तुतिहरूको संयोजन गर्दै कार्यक्रमलाई थप आकर्षक र उत्साहपूर्ण बनाउन महत्त्वपूर्ण भूमिका निर्वाह गर्नुभएको थियो।.jpeg)
विशेषगरी बालकलाकारहरू एरिना भुसाल र आरोही भुसाल ले प्रस्तुत गरेको आकर्षक नृत्यले उपस्थित दर्शकहरूको मन जितेको थियो। बालबालिकाको उत्साहपूर्ण प्रस्तुतिले कार्यक्रमस्थलमा छुट्टै रौनक थपेको थियो भने उपस्थित दर्शकहरूले ताली बजाएर उनीहरूलाई प्रोत्साहन गरेका थिए।
त्यसैगरी, शोभा कुइँकेल र सरस्वती चौधरी ले प्रस्तुत गरेको नृत्यले कार्यक्रमको वातावरण थप रमाइलो बनाएको थियो। आफ्नो प्रस्तुति सम्पन्न गरेपछि उहाँहरूले उपस्थित सहभागीहरूलाई समेत सामूहिक नृत्यमा सहभागी गराउनुभएको थियो। नेपाली गीतसङ्गीतमा बालबालिकादेखि अग्रजसम्म सबै उमेर समूहका सहभागीहरू रमाउँदा कार्यक्रमस्थल नेपाली सांस्कृतिक उत्सवमय बनेको थियो।
यसैबीच मीनप्रसाद शर्मा ले नेपाली समुदायमा लोकप्रिय मनोरञ्जनात्मक खेल ‘झन्डीबुर्जा’ सञ्चालन गर्दै सहभागीहरूलाई थप मनोरञ्जन प्रदान गर्नुभएको थियो। उक्त खेलमा सहभागीहरूको उत्साहजनक सहभागिताले कार्यक्रमलाई अझ रमाइलो र स्मरणीय बनाएको थियो।
डक्युमेन्टरियन नागेन्द्र कार्कीद्वारा अनुभव आदानप्रदान
नेपाली विद्यार्थी समाजका डक्युमेन्टरियन नागेन्द्र कार्की ले कार्यक्रममा उपस्थित अतिथिहरूसँग आफ्नो अनुभव तथा अनुभूति आदानप्रदान गर्नुभएको थियो।
उहाँले नेपाली समुदायबीचको आत्मीयता, सहकार्य तथा सांस्कृतिक एकताको महत्त्वलाई उजागर गर्दै यस्ता कार्यक्रमले विदेशमा रहेका नेपालीहरूलाई आफ्नो संस्कृति र समुदायसँग जोडिराख्न सहयोग पुग्ने भावना व्यक्त गर्नुभएको थियो।
नेपाली परिकारले दिलायो घरदेशको स्वाद
.jpeg)
कार्यक्रममा परम्परागत तथा स्वादिष्ट नेपाली खानाका विभिन्न परिकारहरूको समेत व्यवस्था गरिएको थियो।
विदेशी भूमिमा नेपाली परिकारको स्वाद लिन पाउँदा सहभागीहरूले नेपालका चाडपर्व, पारिवारिक जमघट तथा सामूहिक भोजको सम्झना गरेका थिए। नेपाली खानाले कार्यक्रममा सांस्कृतिक आत्मीयता थप्नुका साथै उपस्थित नेपाली तथा विदेशी अतिथिहरूलाई नेपाली खानपान संस्कृतिसँग परिचित गराउने अवसर प्रदान गरेको थियो।
खाना तयारी तथा व्यवस्थापनमा विशेष योगदान पुर्याउनुहुने सुधीर भट्टराई लगायत मीनप्रसाद शर्मा, नवीन दंगाल, दिलार नेपाल, दीपक रेग्मी, सरस्वती चौधरी र आकृति पाण्डे प्रति नेपाली विद्यार्थी समाजले विशेष धन्यवाद व्यक्त गरेको थियो।
उहाँहरूको समय, मेहनत, सहयोग र सक्रियताले सहभागीहरूलाई स्वादिष्ट नेपाली परिकार उपलब्ध गराउन तथा कार्यक्रम सफल बनाउन महत्त्वपूर्ण योगदान पुगेको आयोजकले जनाएको छ।
फोटोग्राफीमा दृष्टान्त सिलवालको सक्रिय भूमिका
.jpeg)
कार्यक्रमका विभिन्न महत्त्वपूर्ण क्षण, सांस्कृतिक प्रस्तुति, अतिथिहरूको सहभागिता तथा सामूहिक रमाइलोलाई तस्बिरमा कैद गर्ने कार्यमा दृष्टान्त सिलवाल ले सक्रिय भूमिका निर्वाह गर्नुभएको थियो।
कार्यक्रम अवधिभर उहाँले देखाउनुभएको लगनशीलता र सक्रियताको प्रशंसा गर्दै नेपाली विद्यार्थी समाजले विशेष धन्यवाद व्यक्त गरेको थियो।
यस्ता सांस्कृतिक कार्यक्रमका तस्बिर तथा सम्झनाहरूले भविष्यमा नेपाली समुदायको एकता, सक्रियता र सांस्कृतिक गतिविधिहरूको इतिहासलाई जीवन्त राख्न सहयोग पुग्ने विश्वास आयोजकले व्यक्त गरेको छ।
सामूहिक प्रयास र एकताले कार्यक्रम सफल
कार्यक्रमको सफलतामा नेपाली विद्यार्थी समाजको वर्तमान कार्यसमिति, स्वयंसेवक, विद्यार्थी, नेपाली समुदायका अग्रज व्यक्तित्व, विभिन्न पेसामा आबद्ध नेपाली परिवार तथा सम्पूर्ण सहभागीहरूको महत्त्वपूर्ण योगदान रहेको आयोजकले जनाएको छ।
अध्ययन, अध्यापन, अनुसन्धान, जागिर तथा पारिवारिक जिम्मेवारीका कारण व्यस्त रहँदारहँदै पनि सबैले समय निकालेर कार्यक्रममा देखाएको उत्साह, सहयोग र सक्रियताले कार्यक्रम सफल भएको सहभागीहरूको धारणा थियो।
कार्यसमितिका पदाधिकारीहरूले “कुनै पनि संस्थाको वास्तविक सफलता पदाधिकारीहरूको व्यक्तिगत प्रयासमा मात्र नभई सम्पूर्ण समुदायको एकता, विश्वास, सहकार्य र सहभागितामा निर्भर हुन्छ” भन्ने भावना व्यक्त गरेका थिए।
उनीहरूले कार्यक्रमको सफलता नेपाली विद्यार्थी समाजको वर्तमान कार्यसमितिको मात्र नभई समग्र एल पासोवासी नेपाली समुदायको साझा उपलब्धि भएको बताएका थिए।
विदेशमा नेपाली पहिचान संरक्षणको सन्देश
कार्यक्रमले नेपालीहरूको महान् चाड दशैँको शुभकामना आदानप्रदान गर्ने अवसर मात्र प्रदान गरेन, विदेशमा रहेका नेपालीहरूबीच आपसी सम्बन्ध सुदृढ गर्दै नेपाली भाषा, कला, संस्कृति र परम्पराको संरक्षण गर्नुपर्ने सन्देशसमेत दिएको थियो।
विशेषगरी विदेशमा हुर्किरहेका नयाँ पुस्तालाई नेपाली संस्कृतिसँग परिचित गराउने, नेपाली तथा विदेशी समुदायबीच सांस्कृतिक आदानप्रदान बढाउने र नेपाली विद्यार्थी तथा परिवारहरूलाई साझा मञ्चमा जोड्ने दृष्टिले कार्यक्रम महत्त्वपूर्ण रहेको सहभागीहरूले बताएका थिए।
नेपाली विद्यार्थी समाज, युटेपले कार्यक्रम सफल बनाउन प्रत्यक्ष तथा अप्रत्यक्ष रूपमा सहयोग गर्नुहुने प्रमुख अतिथि, विशिष्ट अतिथि, प्राध्यापक, कलाकार, स्वयंसेवक, खाना व्यवस्थापनमा संलग्न सहयोगी, फोटोग्राफर तथा सम्पूर्ण नेपाली समुदायप्रति हार्दिक आभार व्यक्त गरेको छ।
साथै, आगामी दिनमा पनि नेपाली समुदायको एकता, सांस्कृतिक पहिचान, आपसी सहयोग र सद्भावलाई अझ सुदृढ बनाउँदै शैक्षिक, सामाजिक तथा सांस्कृतिक गतिविधिहरूलाई निरन्तरता दिने प्रतिबद्धता व्यक्त गरेको छ।
समग्रमा, एल पासोमा सम्पन्न दशैँ शुभकामना आदानप्रदान कार्यक्रमले विदेशी भूमिमा पनि नेपाली मन, नेपालीपन र नेपाली सांस्कृतिक पहिचान जीवन्त रहेको सन्देश दिएको छ। नेपाली विद्यार्थी समाजको पहल र सम्पूर्ण नेपाली समुदायको सहकार्यले सम्पन्न उक्त कार्यक्रम आपसी आत्मीयता, सांस्कृतिक एकता र सामूहिक उत्सवको स्मरणीय अवसर बनेको छ।
-1791642215.jpeg)
