वैश्विक पर्यटनमा निरन्तर वृद्धि : संयुक्त राष्ट्र

समाचार

गृहपृष्ठ
समाचार

वैश्विक पर्यटनमा निरन्तर वृद्धि : संयुक्त राष्ट्र

सामाजिक सञ्चार शुक्रबार, मंसिर १३, २०८२

मेड्रिड, १२ मङ्सिर

सन् २०२५ को पहिलो नौ महिनासम्म विश्वभरि पर्यटक आवागमन लगातार बढ्दै गएको संयुक्त राष्ट्र पर्यटनले बिहीबार सार्वजनिक गरेको नयाँ तथ्याङ्कले देखाएको छ।

संस्थाले आफ्नो त्रैमासिक पर्यटन सूचकमा उल्लेख गरेअनुसार, जनवरीदेखि सेप्टेम्बरसम्म १.१ अर्बभन्दा बढी मानिसले अन्तरदेशीय यात्रा गरेका छन्, जुन सन् २०२४ को त्यही अवधिको तुलनामा करिब ५ प्रतिशत बढी हो। एशिया-प्रशान्त क्षेत्रमा महामारीपछिको सुधार जारी रहँदा आगमन ८ प्रतिशतले बढेको छ। यद्यपि यो सङ्ख्या सन् २०१९ का स्तरभन्दा अझै करिब १० प्रतिशत कम छ।

अफ्रिकामा पर्यटक आगमन उल्लेखनीय रूपमा बढेको छ-उत्तर अफ्रिकामा ११ प्रतिशत र सहारा दक्षिण अफ्रिकामा १० प्रतिशत वृद्धि दर्ता भएको छ। युरोप विश्वकै सबैभन्दा ठूलो गन्तव्य क्षेत्र रहँदै, सन् २०२५ को पहिलो नौ महिनामा ६२५ मिलियन पर्यटक भित्र्यायो, जुन अघिल्लो वर्षको तुलनामा ४ प्रतिशत बढी हो।

उत्तर अमेरिकामा करिब एक प्रतिशत कमी देखियो भने दक्षिण अमेरिकामा ९ प्रतिशत र मध्य अमेरिकामा ३ प्रतिशत वृद्धि दर्ता भएको छ। यी क्षेत्रमा केही लोकप्रिय गन्तव्यमा यात्रु माग बलियो देखिएको छ। संयुक्त राष्ट्र पर्यटनका महासचिव जुराब पोलोलिकासभिलीका अनुसार, “उच्च मूल्यवृद्धि तथा भू-राजनीतिक तनावका बाबजुद पनि यस वर्ष पर्यटक सङ्ख्या मात्र होइन, आम्दानीको हिसाबले पनि पर्यटन क्षेत्र अघि बढिरहेको छ। विशेष गरी अफ्रिका र युरोपले उल्लेखनीय उपलब्धि हाँसिल गरेका छन्,” उहाँले भन्नुभयो।

संयुक्त राष्ट्र पर्यटनले सन् २०२५ भरिमा विश्व पर्यटन ३ देखि ५ प्रतिशतसम्म वृद्धि हुने अनुमान गरेको छ। तर, भू-राजनीतिक अनिश्चितता र उच्च खर्चले क्षेत्रमा केही जोखिम कायम रहने चेतावनी पनि दिइएको छ। रासस

प्रकाशित मिति: शुक्रबार, मंसिर १३, २०८२ १७:००

प्रतिक्रिया दिनुहोस्