म्याग्दीको पात्लेखेत गाउँ पहिरोको जोखिममा

समाचार

गृहपृष्ठ
समाचार

म्याग्दीको पात्लेखेत गाउँ पहिरोको जोखिममा

सामाजिक सञ्चार बुधबार, भदौ ११, २०८२

म्याग्दी, ११ भदौ

जिल्लाको बेनी नगरपालिका-१० पात्लेखेत गाउँ पहिरोको जोखिममा परेको छ। पात्लेखेतको फेदीबाट बग्ने राहुघाट नदीबाट सुरु भएको बान्द्रेखाल्टी र पाखाको पहिरो गाउँसम्म आइपुगेपछि जोखिम बढेको हो।

पहिरोले ३० जना किसानको सात सय रोपनी खेतीयोग्य जमिन बगाएको बताउँदै करिब आठ हेक्टरभन्दा बढी वन नष्ट गरेको स्थानीय केदार सुवेदीले जानकारी दिनुभयो। उहाँका अनुसार हरि गर्बुजा, खम्बी गर्बुजा, यामबहादुर राम्जाली र लालबहादुर हमालको परिवार पहिरोका कारण विस्थापित भएका छन्।

गोकुल शर्मा, केदार सुवेदी, नरबहादुर मल्ल, जागेश्वर रिजाल, धनबहादुर मल्ल, अर्जुन पराजुली, मनबहादुर रावत, टीका गिरी र कमल मल्लको घर पहिरोको उच्च जोखिममा परेका बेनी नगर कार्यपालिका सदस्य निर्मला मल्लले जानकारी दिनुभयो। उहाँका अनुसार पहिरोका कारण बान्द्रेखाल्टीका ३५ र पाखाका २८ परिवार जोखिममा परेका छन्।

“भिरालो जमिन र कमजोर भूगोल भएको पाखो निरन्तर बगिरहेको छ । खेतबारी धाँजा फाटेर चिरा परेका छन्। घरका पर्खाल चर्किएका छन्। ग्यावियन पर्खाल निर्माण, पानी तर्काउने विधी अपनाइए पनि पहिरो रोकथामको प्रयास सफल भएको छैन्”, उहाँले भन्नुभयो।

केही दिनअघि पहिरोको जोखिम भएको क्षेत्रको निरीक्षण गर्न पुगेका सङ्घीय सरकारका उर्जा, जलस्रोत तथा सिँचाइ राज्यमन्त्री खमबहादुर गर्बुजाले पात्लेखेत पहिरोको प्राविधिक अध्ययन गरी दीर्घकालीन समाधानको पहल गर्ने प्रतिबद्धता जनाउनुभएको थियो। रासस

प्रकाशित मिति: बुधबार, भदौ ११, २०८२ १५:४१

प्रतिक्रिया दिनुहोस्