उत्तराखण्ड बाढीमा फसेका नेपालीको उद्धारका लागि कूटनीतिक पहल भइरहेको छ : प्रधानमन्त्री

समाचार

गृहपृष्ठ
समाचार

उत्तराखण्ड बाढीमा फसेका नेपालीको उद्धारका लागि कूटनीतिक पहल भइरहेको छ : प्रधानमन्त्री

सामाजिक सञ्चार शुक्रबार, साउन २४, २०८२

काठमाडौँ, २३ साउन

प्रधानमन्त्री केपी शर्मा ओलीले भारतको उत्तराखण्डमा आएको विनाशकारी बाढीमा फसेका नेपाली नागरिकको उद्धारका लागि तत्काल कूटनीतिक पहल सुरु गरिएको बताउनुभएको छ।

शुक्रबार सामाजिक सञ्जालमार्फत प्रधानमन्त्री ओलीले बाढीमा १७ जनाभन्दा बढी नेपाली परेको खबरले आफूलाई दुःखी बनाएको उल्लेख गर्दै सरकार उनीहरूको सुरक्षाप्रति गम्भीर रहेको स्पष्ट पार्नुभयो। हाल तुर्कमेनिस्तान भ्रमणमा रहनुभएका प्रधानमन्त्री ओलीका अनुसार उद्धारका लागि नेपाली दूतावासमार्फत तत्काल कूटनीतिक छलफल भएको छ।

उहाँले लेख्नुभएको छ, “छिमेकी मित्रराष्ट्र भारतको उत्तराखण्डमा बाढीले ठूलो जनधनको क्षति पुर्‍याएको दुःखद खबरले चिन्तित छु। बाढीमा १७ जनाभन्दा बढी नेपाली नागरिक परेको खबर आएको छ। उनीहरूको उद्धारका लागि दूतावासमार्फत तत्काल कूटनीतिक पहल भएको छ। बाढी–पहिरोमा ज्यान गुमाउने सबैप्रति श्रद्धाञ्जली अर्पण गर्दै पीडामा रहेका परिवारजनलाई धैर्यधारण गर्ने शक्ति मिलोस् भन्ने कामना गर्दछु।”

यस विपत्तिमा म्याग्दीको कुशे गाउँपालिका–२ का १३ जना सम्पर्कविहीन भएको पालिका अध्यक्षले बताउनुभएको छ। भारतीय सञ्चारमाध्यमका अनुसार उत्तराखण्डमा ‘क्लाउड ब्रस्ट’ का कारण बाढी आएको हो। साथै, उत्तरकाशी क्षेत्रमा हिमताल विस्फोट भएको हुनसक्ने आकलन पनि गरिएको छ।

प्रकाशित मिति: शुक्रबार, साउन २४, २०८२ १०:११

प्रतिक्रिया दिनुहोस्