तराईका केही जिल्लामा हावाहुरीको सम्भावना, सतर्क रहन मौसम महाशाखाको आग्रह

समाज

गृहपृष्ठ
समाज

तराईका केही जिल्लामा हावाहुरीको सम्भावना, सतर्क रहन मौसम महाशाखाको आग्रह

सामाजिक सञ्चार मंगलबार, वैशाख २२, २०८३

काठमाडौं, २२ वैशाख

जल तथा मौसम पूर्वानुमान महाशाखाले आज तराईका केही जिल्लामा हावाहुरी चल्ने सम्भावना रहेको जनाएको छ। महाशाखाका अनुसार आज दिउँसो र राति लुम्बिनी र मधेस प्रदेशका विभिन्न जिल्लामा तीव्र हावाहुरी चल्न सक्ने अनुमान गरिएको छ।

दिउँसो बाँके, दाङ, रुपन्देही, कपिलवस्तु र आसपासका क्षेत्रमा हावाहुरीको प्रभाव पर्ने सम्भावना छ भने राति कपिलवस्तु, रुपन्देही, बारा, पर्सा, रौतहट र आसपासका क्षेत्रमा समेत तीव्र हावाहुरी चल्न सक्ने महाशाखाले जनाएको छ।

सावधानी अपनाउन आग्रह गर्दै महाशाखाले हावाहुरीका बेला अनावश्यक रूपमा घरबाहिर ननिस्कन, घरका झ्याल–ढोका राम्रोसँग बन्द गर्न, घरबाहिर आगो नबाल्न र घरभित्र आगो प्रयोग गर्दा विशेष सावधानी अपनाउन अनुरोध गरेको छ।

त्यस्तै कमजोर संरचना, अग्ला रुख, बिजुलीका खम्बा तथा तारमुनि नबस्न र लत्रिएको विद्युत् तार नछुन पनि आग्रह गरिएको छ।

महाशाखाका अनुसार यसअघि हिजो पनि केही स्थानमा हावाहुरी चलेको थियो। प्रि–मनसुनको समयमा मेघगर्जन, चट्याङ र हावाहुरीजस्ता मौसमी गतिविधि बढ्ने भएकाले आवश्यक सतर्कता अपनाउन मौसमविद्हरूले सुझाव दिएका छन्।

प्रकाशित मिति: बिहीबार, पुस १७, २०२६

प्रतिक्रिया दिनुहोस्