मनोहरा सुकुमवासी बस्ती हटाउन डोजरसहित बाक्लो संख्यामा सुरक्षाकर्मी परिचालन

समाज

गृहपृष्ठ
समाज

मनोहरा सुकुमवासी बस्ती हटाउन डोजरसहित बाक्लो संख्यामा सुरक्षाकर्मी परिचालन

सामाजिक सञ्चार आइतबार, वैशाख १३, २०८३

भक्तपुर, १३ वैशाख

भक्तपुरको मनोहरा क्षेत्रस्थित सुकुमवासी बस्ती हटाउन आइतबार बिहानैदेखि डोजरसहितको टोली परिचालन गरिएको छ। बस्ती क्षेत्रमा ठूलो सङ्ख्यामा सुरक्षाकर्मी तैनाथ गरिएका छन्।

शनिबार बस्ती हटाउने प्रयासका क्रममा स्थानीयवासीले विरोध जनाएपछि स्थिति तनावग्रस्त बनेको थियो। ढुंगामुढा हुँदा केही सुरक्षाकर्मी घाइते भएका थिए।

मनोहरा क्षेत्रमा अनधिकृत रूपमा निर्माण गरिएका ७ सय ७७ घरटहरा रहेको विवरण सार्वजनिक गरिएको छ। शनिबार साँझ सातवटा पक्की घर भत्काइएको थियो । त्यस क्रममा भएको अवरोध र ढुंगामुढाका कारण केही सुरक्षाकर्मी घाइते भएका थिए।

यसअघि शनिबार बिहान थापाथलीस्थित बाग्मती नदी किनारका तथा दिउँसो शान्तिनगर र गैह्रीगाउँ क्षेत्रका अनधिकृत संरचनासमेत हटाइएको थियो।

आज बिहान पुनः पुगेको टोलीले बस्ती खाली गराउने कार्यलाई तीव्रता दिएको छ। मनोहरा नदी किनारमा बसोबास गर्दै आएका स्थानीयवासीले आफ्ना सामान सुरक्षित स्थानतर्फ सार्न थालेका छन् भने सुरक्षाकर्मीले त्यसमा सहजीकरण गरिरहेका छन्।

जिल्ला प्रहरी परिसर भक्तपुरका प्रमुख तथा प्रहरी उपरीक्षक सूर्यबहादुर खड्काका अनुसार बस्ती हटाउने अभियानका लागि बिहानैदेखि भक्तपुरबाट १ हजार ३०० नेपाल प्रहरी र ६०० सशस्त्र प्रहरी परिचालन गरिएको छ। उपत्यकाका विभिन्न प्रहरी युनिट तथा अन्य सुरक्षा निकायका टोलीसमेत परिचालन गरिएको उनले जानकारी दिनुभयो ।

प्रकाशित मिति: बिहीबार, पुस १७, २०२६

प्रतिक्रिया दिनुहोस्