काठमाडौं ।
मनाङको नार्फाभूमि गाउँपालिका–५ स्थित हिमलुङ हिमालमा गएको हिमपहिरोमा परी मृत्यु हुनेको संख्या ११ पुगेको छ। बिहीबार उद्धार तथा खोजीमा खटिएको टोलीले थप चार जनाको शव फेला पारेपछि मृतकको संख्या ११ पुगेको हो।
नेपाल राष्ट्रिय पर्वतारोहण गाइड संघको टोलीले हिमपहिरोले पुरिएको क्षेत्रमा खोजी जारी राखेको छ। उद्धार टोलीका अनुसार हिमपहिरोमा हराइरहेका व्यक्तिहरूको शव बाक्लो हिउँ र पहिरोको भग्नावशेषमुनि पुरिएको अवस्थामा फेला परिरहेको छ। थप फेला परेका चार शवको पहिचान गर्ने प्रक्रिया जारी रहेको बताइएको छ।
गत सेप्टेम्बर २७ अर्थात् असोज ११ गते हिमलुङ हिमालको आधार शिविर क्षेत्रमा भारी हिमपात र वर्षापछि हिमपहिरो गएको थियो। त्यस समयमा आरोहणका लागि आधार शिविर व्यवस्थापन तथा मार्ग तयारीमा खटिएका नेपाली कामदार तथा पर्वतारोहण सहयोगीहरू प्रभावित भएका थिए।
प्रारम्भिक विवरणअनुसार १६ जना आरोहण सहयोगी तथा गाइड सम्पर्कविहीन भएका थिए। उनीहरूमध्ये हालसम्म ११ जनाको शव फेला परेको छ भने पाँच जना अझै सम्पर्कविहीन रहेको उद्धार टोलीले जनाएको छ।
१४ फिटसम्म हिउँले पुरिएको क्षेत्र
हिमपहिरोपछि आधार शिविर क्षेत्रमा ठूलो मात्रामा हिउँ र भग्नावशेष थुप्रिएको छ। उद्धारकर्ताहरूले केही स्थानमा करिब १४ फिटसम्म बाक्लो हिउँ पन्छाएर खोजी गरिरहेका छन्। उच्च उचाइ, अस्थिर हिउँ र प्रतिकूल मौसमका कारण उद्धार कार्य निकै जोखिमपूर्ण बनेको छ।
उद्धार अभियानको नेतृत्व पर्वतारोहण गाइड पासाङ काजी शेर्पा र विक्रम कार्कीले गरिरहेका छन्। उनीहरूसँग अनुभवी पर्वतारोही, उद्धारकर्मी र स्थानीय सहयोगीहरू समेत खोजी अभियानमा संलग्न छन्।
मौसम र भौगोलिक कठिनाइबीच खोजी जारी
उच्च हिमाली क्षेत्रमा मौसम छिटो परिवर्तन हुने भएकाले उद्धार टोलीले सुरक्षालाई प्राथमिकतामा राखेर काम गरिरहेको जनाएको छ। मौसम तथा भौगोलिक अवस्था अनुकूल भए बाँकी सम्पर्कविहीन व्यक्तिको खोजीलाई निरन्तरता दिइने बताइएको छ।
हिमलुङ हिमाल ७,१२६ मिटर अग्लो हिमाल हो। शरद् ऋतुको आरोहण सिजनका लागि आधार शिविर तयार गर्ने क्रममा यो दुर्घटना भएको हो। घटनाका बेला हिमलुङमा विदेशी आरोहीहरू भने उपस्थित नरहेको रिपोर्टमा उल्लेख छ।
-1790850306.png)
-1790651441.jpeg)
