सुर्खेत । कर्णाली प्रदेशका मुख्यमन्त्री मंगलबहादुर शाहीले प्रदेशसभाबाट विश्वासको मत प्राप्त गरेका छन्। बुधबार बसेको प्रदेशसभा बैठकमा मुख्यमन्त्री शाहीले प्रस्तुत गरेको विश्वासको मतसम्बन्धी प्रस्ताव बहुमतले पारित भएको हो।
४० सदस्यीय कर्णाली प्रदेशसभामा बुधबार ३६ जना सांसद मतदान प्रक्रियामा सहभागी भएका थिए। मुख्यमन्त्री शाहीको पक्षमा २१ मत परेको छ भने १३ सांसदले विपक्षमा मतदान गरेका छन्। दुई सांसद भने तटस्थ बसेका छन्। सरकार सञ्चालनका लागि आवश्यक २१ मत नै प्राप्त भएपछि शाही नेतृत्वको सरकारलाई प्रदेशसभाको समर्थन सुनिश्चित भएको छ।
मुख्यमन्त्री शाहीलाई सत्तारूढ नेपाली कम्युनिस्ट पार्टी र नेकपा एमालेका सांसदहरूले समर्थन गरेका छन्। उपलब्ध विवरणअनुसार नेपाली कम्युनिस्ट पार्टीका १४ सांसदमध्ये १३ जनाले शाहीको पक्षमा मतदान गरेका थिए। त्यस्तै, एमालेका ९ सांसदले पनि विश्वासको मतको पक्षमा मतदान गरेका छन्। एमालेका सांसद विनोदकुमार शाह स्वास्थ्य समस्याका कारण बैठकमा उपस्थित हुन सकेनन्।
प्रमुख प्रतिपक्षी नेपाली कांग्रेसका उपस्थित सांसदहरूले भने शाहीको विपक्षमा मतदान गरेका छन्। कांग्रेसका १४ सांसदमध्ये १२ जना मतदानमा सहभागी भएका थिए। स्वतन्त्र सांसद देवेन्द्र शाहीले पनि विश्वासको मतको विपक्षमा मतदान गरेका छन्।
शाही नेपाली कम्युनिस्ट पार्टीका प्रदेश संसदीय दलका नेता हुन्। नेकपा र नेकपा एमालेबीचको सत्ता सहकार्यपछि उनी गत १२ साउनमा कर्णाली प्रदेशको मुख्यमन्त्रीमा नियुक्त भएका थिए। एमालेको समर्थनमा सरकार गठन गरेका शाहीले त्यसपछि प्रदेशसभाबाट विश्वासको मत लिएका हुन्।
विश्वासको मत पाएसँगै शाही नेतृत्वको कर्णाली सरकारलाई प्रदेशसभाबाट आवश्यक संवैधानिक समर्थन प्राप्त भएको छ। यससँगै सरकार सञ्चालन, नीति तथा कार्यक्रम कार्यान्वयन र प्रदेशका विकास तथा प्रशासनिक कामलाई अघि बढाउने बाटो थप स्पष्ट भएको छ।
सरकार गठनपछि सत्ता साझेदार दलबीच मन्त्रालय बाँडफाँट तथा सरकार सञ्चालनसम्बन्धी विषयमा देखिएको अन्योलका बीच शाहीले विश्वासको मत लिएका हुन्। अब सरकारको प्राथमिकता प्रदेशका विकास आयोजना, सेवा प्रवाह र सत्ता साझेदार दलबीचको समन्वयलाई प्रभावकारी बनाउनेतर्फ केन्द्रित हुने अपेक्षा गरिएको छ।
प्रदेशसभाकी सभामुख नन्दा गुरुङले विश्वासको मतसम्बन्धी प्रस्ताव बहुमतले पारित भएको घोषणा गरेसँगै शाहीले सरकार सञ्चालनका लागि आवश्यक राजनीतिक आधार प्राप्त गरेका छन्।
-1787024774.jpg)
