बिर्तामोडबाट एक महिनामा एक करोडको केरा बिक्री

कृषि

गृहपृष्ठ
कृषि

बिर्तामोडबाट एक महिनामा एक करोडको केरा बिक्री

सामाजिक सञ्चार आइतबार, कात्तिक १७, २०८२

झापा, १६ कात्तिक

बिर्तामोडस्थित कृषि थोक बजारबाट एक महिनाको अवधिमा एक करोड पाँच लाख ९० हजार ८०० को केरा बिक्री भएको छ। इलामको दानाबारी, महमाई र झापाको खुदुनाबारी, शनिश्चरे, मेचीनगर, भद्रपुरलगायत स्थानबाट केरा बिक्रीका लागि किसान यहाँ आउछन्।

दसैँ, तिहार र छठ पर्वको अवसरमा १९ हजार २५६ घरी केरा औसतमा प्रतिघरी ५५० का दरले बिक्री भएको कृषि बजार व्यवस्थापन समितिकी तथ्याङ्क सहायक अधिकृत माया राजवंशीले जानकारी दिनुभयो। उहाँले गत असोज १० गतेदेखि कात्तिक १२ गतेसम्ममा सो मात्रामा केरा बिक्री भएको बताउनुभयो।

उहाँका अनुसार यहाँबाट विराटनगर, जनकपुर, काठमाडौँलगायत स्थानमा न्यूनतम ३०० देखि अधिकतम रु ८०० सम्ममा मालभोक, भण्डारी, जाहजी र चिनीचम्पा केरा जाने गरेको छ। उनले दसैँ र तिहारमा भन्दा बढी छठपर्वमा केरा बिक्री भएको बताउनुभयो।

यहाँ ठूलो व्यापारिक केन्द्रका रूपमा रहेको उक्त थोक बजारमा ताप्लेजुङ, पाँचथर, इलामलगायत पहाडी जिल्लामा उत्पादित कृषिजन्य वस्तुको विषादी मापन गर्ने प्रयोगशाला पनि छ। तथ्याङ्क सहायक अधिकृत राजवंशीले यहाँ आएका फलफूल, तरकारीलगायत कृषिजन्य वस्तुको विषादी चेकजाँचपछि मात्र खानयोग्यलाई बजार पठाउने गरिएको जानकारी दिनुभयो। रासस

प्रकाशित मिति: आइतबार, कात्तिक १७, २०८२ १६:१४

प्रतिक्रिया दिनुहोस्