स्वास्थ्य मन्त्रालय भन्छ- कोरोनाको 'नयाँ भेरियन्ट' देखिएको छैन

समाचार

गृहपृष्ठ
समाचार

स्वास्थ्य मन्त्रालय भन्छ- कोरोनाको 'नयाँ भेरियन्ट' देखिएको छैन

सामाजिक सञ्चार बिहीबार, पुस ७, २०७९

काठमाडौँ । छिमेकी मुलुकहरूमा धमाधम काेराेना भाइरस संक्रमण देखिएपछि नेपालमा पनि काेराेनाकाे डर पैदा हुन थालेकाे छ।

अन्य मुलुकमा काेराेनाकाे नयाँ भेरियन्ट आएका समाचारहरू आइरहँदा नेपालमापनि काेराेनाकाे नयाँ भेरियन्ट आएकाे भन्ने हल्ला आएपछि स्वास्थ्य मन्त्रालयले हल्लाकाे पछि नलागि सचेत रहन आग्रह गरेकाे छ।

नेपालमा हालसम्म कोरोना भाइरसको नयाँ भेरियन्ट नदेखिएको मन्त्रालयकाे भनाइ छ। स्वास्थ्य तथा जनसङ्ख्या मन्त्रालयका सहप्रवक्ता डा समीरकुमार अधिकारीले छिमेकी मुलुकमा देखिएको वी.एफ ७ नामक प्रजातिको नयाँ भेरियन्ट नेपालमा फेला नपरेको जानकारी दिए। उनका अनुसार एक महिनामा देशका विभिन्न ठाउँबाट संकलन गरिएका नमुनाको ‘जिन सिक्वेन्सिन’ गर्दा वीएफ ७ नामक प्रजातिको भेरियन्ट फेला नपरेको हो ।

राष्ट्रिय जनस्वास्थ्य प्रयोगशाला टेकुमा ४८ नमुना परीक्षण गर्दा सबैमा ओमिक्रोन भेरियन्ट फेला परेको उनले बताए ।

मन्त्रालयका सहप्रवक्ता डा अधिकारीले केही देशमा सङ्क्रमणको नयाँ भेरियन्ट पुष्टि हुँदै फैलिँदै गरेको अवस्थामा मन्त्रालयले निगरानी बढाउने एवम् सम्बन्धित देशसँग समन्वय गर्ने कार्य भइरहेको जानकारी दिए । नेपालमा कोभिड–१९ को सङ्क्रमण कम भए पनि विश्वव्यापी रुपमा हेर्दा केही देशहरुमा भने सङ्क्रमणको नयाँ स्वरुप बढिरहेकाले जोखिम रहेको मन्त्रालयले जनाएको छ । हाम्रै छिमेकी देशहरुमा सङ्क्रमणको पछिल्लो अवस्थाबाट हामी सुसूचित हुँदै सजग हुन आवश्यक रहेको उनले बताए ।

कोभिड-१९ को सङ्क्रमणको जोखिम फरक स्वरुपमा देखिरहेकाले पछिल्लो अवस्थालाई मध्यनजर गर्दै मन्त्रालयले सबैलाई मास्कको प्रयोग गर्न, एक अर्काबीच भौतिक दूरी कायम राख्न र व्यक्तिगत हातको सरसफाइमा विशेष ध्यान दिन अनुरोध गरेको छ ।

मन्त्रालयले सबै सिमानाका विन्दुका स्वास्थ्य सहायता कक्षहरुमा स्क्रिनिङ, निगरानी, सतर्कता एवम् आवश्यक तयारी गर्न आग्रह गरेको छ ।

प्रकाशित मिति: बिहीबार, पुस ७, २०७९ २०:१९

प्रतिक्रिया दिनुहोस्