देशभर सक्रिय मनसुन : चार प्रदेशमा भारी वर्षाको सम्भावना, सतर्क रहन आग्रह

मौसम

गृहपृष्ठ
मौसम

देशभर सक्रिय मनसुन : चार प्रदेशमा भारी वर्षाको सम्भावना, सतर्क रहन आग्रह

सामाजिक सञ्चार सोमबार, साउन ६, २०८२

काठमाडौँ: हाल सक्रिय मनसुनका कारण देशभरि वर्षाको सम्भावना रहेको मौसम पूर्वानुमान महाशाखाले जनाएको छ। विशेषगरी कोशी, बागमती, गण्डकी र सुदूरपश्चिम प्रदेशका केही स्थानमा भारी वर्षा हुन सक्ने पूर्वानुमान गर्दै महाशाखाले बाढी, पहिरो र भू-क्षयको जोखिम बढ्न सक्ने भन्दै सर्वसाधारणलाई सतर्क रहन आग्रह गरेको हो।

महाशाखाका अनुसार, मनसुनको न्यून चापीय रेखा अहिले नेपालको सरदर स्थान नजिक रहेकाले जलवाष्पयुक्त हावाको प्रभाव देशभर फैलिएको छ। यसको असरले लुम्बिनी, कर्णाली र सुदूरपश्चिम प्रदेशसहितका पहाडी क्षेत्रहरूमा बिहानैदेखि आंशिकदेखि सामान्य बदली रही केही स्थानमा चट्याङसहित हल्कादेखि मध्यम वर्षा भइरहेको छ।

आज दिउँसो देशभरको मौसम आंशिकदेखि सामान्य बदली रहने अनुमान गरिएको छ। विशेषगरी पहाडी भूभागका केही स्थान र अन्य क्षेत्रका थोरै स्थानमा चट्याङसहित हल्कादेखि मध्यम वर्षा हुन सक्नेछ। साथै, कोशी, बागमती, गण्डकी र सुदूरपश्चिम प्रदेशका एक-दुई स्थानमा भारी वर्षाको सम्भावना छ भने उच्च पहाडी र हिमाली क्षेत्रका केही ठाउँमा हल्का हिमपात समेत हुन सक्ने महाशाखाले जनाएको छ।

आज राति पनि कोशी, बागमती, गण्डकी र सुदूरपश्चिम प्रदेशमा वर्षा जारी रहनेछ। तीमध्ये कोशी र सुदूरपश्चिमका केही स्थानमा भारी वर्षा हुन सक्ने पूर्वानुमान गरिएको छ।

महाशाखाले भारी वर्षा हुने सम्भावना रहेका स्थानहरूमा नदीको जलस्तर बढ्न सक्ने, बाढी तथा पहिरोको जोखिम उच्च हुने भएकाले नदी किनार तथा पहाडी सडक क्षेत्रतर्फ यात्रा गर्दा विशेष सावधानी अपनाउन सुझाव दिएको छ। साथै, सम्भावित प्राकृतिक विपद्बाट जोगिन आवश्यक तयारी र सतर्कता अपनाउन आम नागरिकलाई अनुरोध गरिएको छ।

प्रकाशित मिति: सोमबार, साउन ६, २०८२ १०:५२

प्रतिक्रिया दिनुहोस्