एमसीसी पास गरेपछि माओवादी केन्द्रमा भुकम्प, नारायणकाजीलाई फकाउँदै प्रचण्ड

राजनीति

गृहपृष्ठ
राजनीति

एमसीसी पास गरेपछि माओवादी केन्द्रमा भुकम्प, नारायणकाजीलाई फकाउँदै प्रचण्ड

सामाजिक सञ्चार बिहीबार, फागुन १९, २०७८

नेकपा (माओवादी केन्द्र) का अध्यक्ष प्रचण्ड र नारायणकाजी श्रेष्ठबीच बिहीबार भेटवार्ता भएको छ । आज बिहान प्रचण्ड निवासमा भएको भेटवार्तामा पार्टी एकता कायम गर्ने विषयमा छलफल भएको हो । सुरुमा नेकपा माओवादी केन्द्रले संशोधन नगरी एमसीसी पास गर्न कुनै पनि हालतमा सहयोग नगर्ने बताएको थियो ।

प्रचण्डले आफूहरु सरकारबाट बाहिरीन तयार भएको तर यथास्थितिमा एमसीसी पास गर्न सहयोग नगर्ने बताएका थिए । प्रधानमन्त्री शेरबहादुर देउवाले एमसीसी पास गर्न सहयोग नगरे सरकारबाट तत्काल बाहिरिन चेतावनी दिँदै नेकपा एमालेसँग छलफल जारी राखेपछि प्रचण्ड आफ्नो अडानबाट पछि हटेका हुन् । संसदबाट एमसीसी पास भएपछि प्रचण्डले सभामुख अग्निप्रसाद सापकोटा र माधवकुमार नेपालसहित १४ संसदको पद जोगाउनको लागि आफ्नो अडान बाट पछि हटेको दावी गरे । नेकपा माओवादी केन्द्रले एमसीसी पास गर्न सहयोग गरेपछि चर्को आलोचना भइरहेको छ । पार्टीका कार्यकर्ताहरु नै प्रचण्डको विरोध गरिरहेका छन् । कार्यकर्ताहरु अर्को पार्टीमा समेत प्रवेश गरिरहेका छन् ।

यता नेकपा माओवादी केन्द्रको एमसीसी संसदबाट व्याख्यात्मक घोषणासहित पास गर्ने निर्णयमा नेता श्रेष्ठ पनि असन्तुष्ट छन् । संसदबाट एमसीसी पास भइसकेपछि पनि श्रेष्ठले आफ्नो विमति सार्वजनिक गर्दै आएका छन् । एमसीसी संसदबाट अनुमोदन भइसकेपछि आयोजित पत्रकार सम्मेलनमा प्रचण्डले नारायणकाजीलाई लक्षित गर्दै पार्टीबाट अलग हुन खोजेको भए कसैले पनि नरोक्ने अभिव्यक्ति दिएपछि यी दुई नेताबीच मतभेद बढेको हो ।

प्रचण्डले नारायणकाजीलाई यदि एमसीसीको बारेमा धारणा राख्ने भए पार्टीभित्र राख्न आग्रह गरेका छन् । तर बाहिरीरुपमा पार्टीको बदनाम हुने गरी एमसीसीको विपक्षमा भाषण नगर्न समेत सुझाव दिएका छन् । तर पछिल्लो समय नारायणकाजीले पार्टी छोड्ने संकेत गरेपछि प्रचण्ड उनलाई फकाउनको लागि सक्रिय देखिएका छन् । बिहीबार बिहानको छलफलमा प्रचण्डले पार्टीबाट अलग नहुन आग्रह गरेका छन् । तर श्रेष्ठले “मलाई अलग हुने मन नहुँदा नहुँदै पनि तपाईंले नै अलग्याउन खोज्नुभएको छ” भनेको स्रोतले जानकारी दियो ।

नारायणकाजीलाई फकाउने प्रयासमा यसअघि अध्यक्ष प्रचण्ड र वर्षमान पुनले नारायणकाजीको निवास हात्तीवनमा पुगेर छुट्टाछुट्टै छलफल गरेका थिए । प्रचण्डले एमसीसीमा मतभेद भएपनि अरू विषयमा मिलेर अघि बढ्न प्रस्ताव गरेका थिए ।

माओवादीको विवादमा विप्लवको इन्ट्री

नेकपा माओवादी केन्द्रको विवादमा नेत्रविक्रम चन्द ‘विप्लव’ ले इन्ट्री गरेका छन् । असन्तुष्ट वरिष्ठ नेता श्रेष्ठले बुधबार विप्लवसँग गरेको संवादलाई अर्थपूर्णरुपमा हेरिएको छ । बुधबार भएको संवादमा यी दुबै नताले सहकार्यका लागि प्रस्ताव गरेका छन् । एमसीसी अनुमोदनपछि असन्तुष्ट रहेका नेता श्रेष्ठलाई पार्टी एकता गर्ने प्रस्ताव लिएर विप्लव उनकै निवासमा पुगेका थिए । श्रेष्ठले पूर्व एकता केन्द्र ब्युताउने तयारी गरिरहेका बेला विप्लवले उनीसँग भेटवार्ता गरेका हुन् ।

यो संवादसँगै माओवादी केन्द्रभित्रको विवाद नयाँ मोडमा प्रवेश गर्न सक्ने अडकलबाजी हुन थालेको छ । एमसीसीलाई लिएर नारायणकाजी श्रेष्ठले कडा विरोध जनाएपछि अध्यक्ष प्रचण्डले पार्टी छाडेर जाने भए रोक्न नसक्ने अभिव्यक्ति दिएपछि नेता श्रेष्ठ चिढिएका हुन् ।

माओवादी जनयुद्धमा आफ्नो साथमा रहेका नेत्रविक्रम चन्द विप्लवले प्रचण्डलाई थप तनाब दिएका छन् । विप्लवले पछिल्लो समय प्रचण्ड पतनको बाटोमा पुगेको समेत दाबी गरेका थिए । पार्टीभित्र विवाद बढेपछि नारायणकाजीसँग विप्लवले छलफल चलाएपछि प्रचण्डलाई फेरि चुनौती थपिएको छ ।

प्रकाशित मिति: बिहीबार, फागुन १९, २०७८ १३:५७

प्रतिक्रिया दिनुहोस्