जनकपुरधाम, १५ जेठ। मधेस प्रदेश सरकारका गृह, सञ्चार तथा कानुन मन्त्री फकिरा महतोले नेपाल पत्रकार महासङ्घ मधेस प्रदेश समितिको प्रादेशिक भवन निर्माण कार्यको शिलान्यास गर्नुभएको छ। जनकपुरधाम उपमहानगरपालिका–४ स्थित मिथिला नाट्य कला परिषद् तथा प्रादेशिक प्रयोगशालाको नजिक रहेको जग्गामा आयोजित एक विशेष समारोहबीच मन्त्री महतोले भवन निर्माणको शुभारम्भ गर्नुभएको हो।
शिलान्यास कार्यक्रममा बोल्दै मन्त्री महतोले स्वतन्त्र, जिम्मेवार र व्यावसायिक पत्रकारिताको विकासका लागि आवश्यक भौतिक पूर्वाधार निर्माणमा प्रदेश सरकार प्रतिबद्ध रहेको बताउनुभयो। उहाँले पत्रकार महासङ्घको भवन निर्माण कार्यलाई समयमै सम्पन्न गर्न आवश्यक सहयोग उपलब्ध गराइने उल्लेख गर्दै निर्माणका लागि आवश्यक अपुग बजेट आगामी आर्थिक वर्षको बजेटमा समावेश गर्ने प्रतिबद्धता व्यक्त गर्नुभयो।
मन्त्री महतोले लोकतन्त्रको सुदृढीकरण, सुशासनको प्रवर्द्धन तथा नागरिक अधिकारको संरक्षणमा सञ्चार क्षेत्रको भूमिका महत्वपूर्ण रहेको उल्लेख गर्नुभयो। पत्रकारहरूका लागि संस्थागत पूर्वाधारको अभाव महसुस भइरहेको अवस्थामा महासङ्घको आफ्नै भवन निर्माण हुनु सकारात्मक उपलब्धि हुने उहाँको भनाइ थियो।
“पत्रकारिता क्षेत्रलाई अझ व्यवस्थित, मर्यादित र व्यावसायिक बनाउन राज्यले आवश्यक सहयोग गर्नुपर्छ,” मन्त्री महतोले भन्नुभयो, “पत्रकार महासङ्घको भवन निर्माणका लागि आवश्यक स्रोत व्यवस्थापन गर्न प्रदेश सरकार सकारात्मक छ र अपुग रकम आगामी बजेटमार्फत सुनिश्चित गर्नेछ।”
कार्यक्रममा नेपाल पत्रकार महासङ्घका प्रदेश तथा जिल्ला तहका पदाधिकारी, सञ्चारकर्मी, विभिन्न राजनीतिक दलका प्रतिनिधि, नागरिक समाजका अगुवा तथा स्थानीय जनप्रतिनिधिहरूको सहभागिता रहेको थियो। सहभागीहरूले पत्रकार महासङ्घको आफ्नै भवन निर्माणले पत्रकारहरूको संस्थागत क्षमता अभिवृद्धि हुनुका साथै पत्रकारिता क्षेत्रको विकासमा टेवा पुग्ने विश्वास व्यक्त गरेका थिए।
नेपाल पत्रकार महासङ्घ मधेस प्रदेश समितिले लामो समयदेखि आफ्नै सुविधा सम्पन्न भवन निर्माणको आवश्यकता औँल्याउँदै आएको थियो। भवन निर्माण सम्पन्न भएपछि महासङ्घका प्रशासनिक गतिविधि सञ्चालन, तालिम, गोष्ठी, अन्तरक्रिया तथा पत्रकारहरूको क्षमता विकाससम्बन्धी कार्यक्रमहरू सञ्चालन गर्न सहज हुने अपेक्षा गरिएको छ।
भवन निर्माण परियोजनाले मधेस प्रदेशका सञ्चारकर्मीहरूको साझा संस्थागत केन्द्रको रूपमा काम गर्ने विश्वास लिइएको छ। यसले पत्रकारहरूबीच समन्वय, सहकार्य र व्यावसायिक दक्षता अभिवृद्धिमा समेत महत्वपूर्ण योगदान पुर्याउने अपेक्षा गरिएको छ।
कार्यक्रममा वक्ताहरूले प्रेस स्वतन्त्रताको संरक्षण, पत्रकारहरूको पेशागत सुरक्षा तथा सञ्चार क्षेत्रको समग्र विकासका लागि राज्यका सबै निकायले सहकार्य गर्नुपर्नेमा जोड दिएका थिए।
