डा. मनोजकुमार शर्मा नेपालको ३३ औँ प्रधान न्यायाधीशमा नियुक्त

समाचार

गृहपृष्ठ
समाचार

डा. मनोजकुमार शर्मा नेपालको ३३ औँ प्रधान न्यायाधीशमा नियुक्त

सामाजिक सञ्चार बुधबार, जेठ ६, २०८३

काठमाडौँ, ६ जेठ

सर्वोच्च अदालतका न्यायाधीश डा. मनोजकुमार शर्मा नेपालको ३३ औँ प्रधान न्यायाधीशमा नियुक्त हुनुभएको छ। संसदीय सुनुवाइ समितिबाट नाम अनुमोदन भएपछि राष्ट्रपति रामचन्द्र पौडेलले शर्मालाई प्रधान न्यायाधीशमा नियुक्त गर्नुभएको हो।

संवैधानिक परिषद्को सिफारिसका आधारमा राष्ट्रपतिबाट प्रधान न्यायाधीश नियुक्त गर्ने संवैधानिक व्यवस्था रहेको छ। नियुक्तिपछि शर्माले मङ्गलबार नै पद तथा गोपनीयताको शपथ ग्रहण गर्दै पदभार सम्हाल्नुभएको छ।

संवैधानिक परिषद्को वैशाख २४ गते बसेको बैठकले शर्मालाई प्रधान न्यायाधीशमा सिफारिस गरेको थियो। सर्वोच्च अदालतमा कार्यरत न्यायाधीशमध्ये उहाँ रोलक्रममा चौथो नम्बरमा हुनुहुन्थ्यो। शर्माभन्दा वरिष्ठ कायममुकायम प्रधान न्यायाधीश सपना प्रधान मल्ल, न्यायाधीश कुमार रेग्मी र हरिप्रसाद फुयाँल हुनुहुन्थ्यो। वरिष्ठताको क्रम पालना नगरिएको भन्दै प्रमुख प्रतिपक्ष दलका नेता तथा राष्ट्रियसभा अध्यक्षले निर्णयमा फरक मतसमेत लेख्नुभएको थियो।

संविधानअनुसार प्रधान न्यायाधीशको कार्यकाल छ वर्षको हुने व्यवस्था छ। सोहीअनुसार शर्माले २०८९ जेठ ४ गतेसम्म पदमा रहनुहुनेछ। हालसम्म अधिकांश प्रधान न्यायाधीश ६५ वर्षे उमेर हदका कारण अवकाश हुँदै आएका छन्।

पर्सामा २०२७ असार ४ गते जन्मिनुभएका शर्मा २०७६ वैशाख ६ गते सर्वोच्च अदालतको न्यायाधीशमा नियुक्त हुनुभएको थियो। यसअघि उहाँ २०७० जेठ २७ गते तत्कालीन पुनरावेदन अदालतमा अतिरिक्त न्यायाधीश नियुक्त हुनुभएको थियो। २०७२ सालमा नयाँ संविधान जारी भएपछि अतिरिक्त न्यायाधीशको व्यवस्था खारेज भएसँगै उहाँ उक्त पदबाट बाहिरिनुभएको थियो ।

प्रकाशित मिति: बिहीबार, पुस १७, २०२६

प्रतिक्रिया दिनुहोस्