त्रिभुवन विश्वविद्यालयमा संयुक्त विद्यार्थी आन्दोलनको मार्चपास

समाचार

गृहपृष्ठ
समाचार

त्रिभुवन विश्वविद्यालयमा संयुक्त विद्यार्थी आन्दोलनको मार्चपास

सामाजिक सञ्चार मंगलबार, वैशाख १५, २०८३

काठमाडौं, १५ वैशाख

सरकारले विभिन्न राजनीतिक दलनिकट विद्यार्थी संगठनमाथि प्रतिबन्ध लगाउने तयारी गरेको भन्दै विद्यार्थीहरूले विरोध प्रदर्शन गरेका छन्।

संयुक्त विद्यार्थी आन्दोलनको आह्वानमा आज त्रिभुवन विश्वविद्यालय परिसरमा मार्चपास गरेको छ। घण्टाघरदेखि टीयू गेटसम्म गरिएको मार्चपासमा सहभागी विद्यार्थीहरूले सरकारको प्रस्तावित निर्णयप्रति असन्तुष्टि जनाएका छन्।

विद्यार्थी संगठनमाथि प्रतिबन्ध लगाउने कदम संविधान र लोकतान्त्रिक मूल्य–मान्यताविपरीत तथा नागरिक अधिकारमाथिको प्रत्यक्ष हस्तक्षेप भएको उनीहरूको आरोप छ। उक्त निर्णय तत्काल फिर्ता लिनुपर्ने उनीहरूको माग छ।

यसैबीच आन्दोलनरत विद्यार्थीहरूले अन्य मागहरू पनि अघि सारेका छन्। उनीहरूले बढ्दो महँगी नियन्त्रण गर्न, शैक्षिक संस्थामा ब्यारेकीकरण गर्ने अभ्यास रोक्न तथा मेरिटोक्रेसी (योग्यता प्रणाली) लागू गर्न माग गरेका छन्।

त्यस्तै, विद्यार्थीलाई यातायातमा दिइँदै आएको ४५ प्रतिशत भाडा छुट यथावत राख्न तथा स्वतन्त्र विद्यार्थी युनियन (स्ववियु) खारेज गर्ने भनिएको निर्णय फिर्ता लिन पनि उनीहरूको माग छ।

मार्चपासमार्फत विद्यार्थीहरूले सरकारको निर्णयप्रति आफ्नो असहमति सार्वजनिक गरेका छन्।

प्रकाशित मिति: बिहीबार, पुस १७, २०२६

प्रतिक्रिया दिनुहोस्