अधिक तरलता व्यवस्थापन गर्न राष्ट्र बैंकले १ खर्ब २० अर्ब निक्षेप संकलन गर्ने

आर्थिक

गृहपृष्ठ
आर्थिक

अधिक तरलता व्यवस्थापन गर्न राष्ट्र बैंकले १ खर्ब २० अर्ब निक्षेप संकलन गर्ने

सामाजिक सञ्चार शुक्रबार, वैशाख ११, २०८३

काठमाडौं, ११ वैशाख

नेपाल राष्ट्र बैंकले वित्तीय प्रणालीमा देखिएको अधिक तरलता व्यवस्थापन गर्न बजारबाट एक खर्ब २० अर्ब रुपैयाँ बराबरको निक्षेप संकलन गर्ने भएको छ। केन्द्रीय बैंकले १९ दिन अवधिका लागि निक्षेप संकलन गर्न बोलकबोल आह्वान गरेको हो।

राष्ट्र बैंकले बजारमा बढ्दो तरलता नियन्त्रण तथा ब्याजदरलाई सन्तुलित राख्न निक्षेप संकलन उपकरण र स्थायी निक्षेप सुविधामार्फत तरलता खिच्दै आएको छ।

यस बोलकबोल प्रक्रियामा राष्ट्र बैंकबाट इजाजतप्राप्त ‘क’, ‘ख’ र ‘ग’ वर्गका बैंक तथा वित्तीय संस्थाले मात्र सहभागिता जनाउन पाउनेछन्। निक्षेप संकलन रकम बाँडफाँट गर्दा सबैभन्दा कम ब्याजदर प्रस्ताव गर्ने संस्थालाई प्राथमिकतामा राखी क्रमशः आह्वान गरिएको रकमसम्म वितरण गरिने व्यवस्था गरिएको छ।

निक्षेप संकलनका लागि शुक्रबार अनलाइन खरिद प्रणालीमार्फत बोलकबोल हुनेछ भने ब्याजदर प्रतिस्पर्धात्मक बोलकबोल प्रक्रियाबाट तय गरिने राष्ट्र बैंकले जनाएको छ। संकलित निक्षेपको साँवा तथा ब्याज २०८३ वैशाख ३० गते भुक्तानी गरिनेछ।

बोलकबोलमा न्यूनतम १० करोड रुपैयाँदेखि अधिकतम कुल आह्वान रकमसम्म आवेदन दिन सकिनेछ। आवेदन रकम ५ करोड रुपैयाँले भाग गर्दा निःशेष भाग जाने गरी प्रस्ताव गर्नुपर्ने व्यवस्था गरिएको छ।

राष्ट्र बैंकको खुला बजार कारोबारसम्बन्धी कार्यविधिअनुसार वित्तीय बजारमा दीर्घकालीन अधिक तरलता देखिएमा त्यसको व्यवस्थापन तथा बजार ब्याजदर नियन्त्रणका लागि बढीमा ६ महिनासम्मका दीर्घकालीन निक्षेप संकलन उपकरण प्रयोग गर्न सकिने व्यवस्था छ। सोही व्यवस्थाअनुसार केन्द्रीय बैंकले समय–समयमा यस्तो उपकरण प्रयोग गर्दै आएको छ।

प्रकाशित मिति: बिहीबार, पुस १७, २०२६

प्रतिक्रिया दिनुहोस्