मन्त्रीलाई मोबाइल फोन उपलब्ध गराएको भन्ने हल्ला पूर्ण रूपमा भ्रामक हो: सञ्चारमन्त्री तिमिल्सिना

समाचार

गृहपृष्ठ
समाचार

मन्त्रीलाई मोबाइल फोन उपलब्ध गराएको भन्ने हल्ला पूर्ण रूपमा भ्रामक हो: सञ्चारमन्त्री तिमिल्सिना

सामाजिक सञ्चार आइतबार, वैशाख ६, २०८३

काठमाडौँ,६ वैशाख

सञ्चार तथा सूचना प्रविधिमन्त्री डा. विक्रम तिमिल्सिनाले सामाजिक सञ्जालमा फैलिने सूचनाको सत्यता र स्रोतबारे सचेत हुन आवश्यक रहेको बताउनुभएको छ।

नुवाकोटको लिखु गाउँपालिका–६ स्थित छहरे बजारमा स्थानीयसँगको भेटघाटका क्रममा उहाँले पछिल्लो समय सरकारका मन्त्रीलाई नयाँ मोबाइल फोन उपलब्ध गराउने तयारी भइरहेको भन्ने सूचना पूर्ण रूपमा भ्रामक भएको स्पष्ट पार्नुभयो। यस्ता हल्लाले सरकारप्रति अनावश्यक अविश्वास सिर्जना गर्ने प्रयास भएको उहाँको भनाइ थियो।

मन्त्री तिमिल्सिनाले नागरिकलाई कुनै पनि सूचना साझा गर्नुअघि त्यसको विश्वसनीयता जाँच गर्न आग्रह गर्दै पुष्टि नभएका सामग्री फैलाउनु जिम्मेवार नागरिकताको हिस्सा नभएको उल्लेख गर्नुभयो।

उहाँले सरकार जनताको करबाट सङ्कलित स्रोतसाधनको सदुपयोगप्रति प्रतिबद्ध रहेको बताउँदै अनियमितता देखिएमा नागरिकले खबरदारी गर्नुपर्नेमा जोड दिनुभयो। “सत्यमा आधारित प्रश्न गर्नुपर्छ, तर सूचना जाँच नगरी फैलाउनु हुँदैन,” उहाँले भन्नुभयो।

सञ्चारमन्त्री तिमिल्सिनाले सरकार सुशासन, विकास र जनसेवा सुधारमा केन्द्रित रहेको बताउँदै परिणाममुखी काम गर्ने प्रतिबद्धता व्यक्त गर्नुभयो।

उहाँले विकास क्रमिक प्रक्रिया भएकाले तत्काल चमत्कारको अपेक्षा नगर्न आग्रह गर्दै दीर्घकालीन सोचका साथ अघि बढ्नुपर्ने धारणा राख्नुभयो। साथै, सरकार नागरिकको आवाज सुनेर नीति निर्माण गर्ने दिशामा अघि बढिरहेको पनि उहाँले स्पष्ट पार्नुभयो।

प्रकाशित मिति: बिहीबार, पुस १७, २०२६

प्रतिक्रिया दिनुहोस्