मेरी संजीवनी सार्वजनिक, स्रष्टा र सम्पादकद्दारा पुस्तक हस्तान्तरण

साहित्य

गृहपृष्ठ
साहित्य

मेरी संजीवनी सार्वजनिक, स्रष्टा र सम्पादकद्दारा पुस्तक हस्तान्तरण

सामाजिक सञ्चार मंगलबार, मंसिर १०, २०८२

अनेसास पोर्चुगलकी कार्यसमिति सदस्य गीतकार सजु पौडेल बरालको ‘मेरी सञ्जीवनी’ गीतसङ्ग्रह लोकार्पण भएको छ।

गत आइतबार पोखरामा भएको कार्यक्रमको आयोजना पृथ्वीनारायण क्याम्पस नेपाली विभागले गरेको थियो। उक्त गीतसङ्ग्रह क्याम्पस प्रमुख प्रा।डा। हरिप्रसाद पाठक, विभागीय प्रुमख डा. यमनाथ तिमिल्सिना, पूर्व विभागीय प्रमुख प्रा.डा. कुसुमाकर न्यौपाने, कृतिका सम्पादक रमेश दाहाल, उपप्राध्यापक गीताकुमारी पौडेल, गीतकार सजु पौडेल बराल, प्रकाशक राजीव बराल र गीतकारकी आमा नारायणी पौडेलले संयुक्त रूपमा लोकार्पण गर्नुभएको हो

प्रमुख आमन्त्रित व्यक्तित्व क्याम्पस प्रमुख प्रा।डा। हरिप्रसाद पाठकले क्याम्पसकी पूर्व छात्राले साधनामा लागेर क्याम्पस सम्झेर आउँदा गौरवबोध भएको बताउँदै पुस्तकबाट प्राप्त रकम लोकसंस्कृतिको अनुसन्धानमा खर्च गर्ने कार्य स्तुत्य रहेको भन्दै सराहनासमेत गर्नुभयो।

पूर्व विभागीय प्रमुख प्रा।डा। कुसुमाकर न्यौपानेले सर्जकको असल चिन्तन र चेतनाले गीत जस्तै गीत सिर्जना हुने धारणा राख्दै सजुलाई असल सर्जककारूपमा चिनाउनुभयो। न्यौपानेले सजुलाई क्याम्पस जीवनकी निडर छात्रा रहेको चिनाउँदै आगामी यात्रालाई थप अध्ययन र साधनासहित परिष्कृत बनाएर अगाडि बढ्न सुझाव दिनुभयो।

अनेसास च्याप्टर सदस्यसमेत रहेकी सजुका सन्दर्भमा न्यौपानेले समारोहबीच विभागीय प्राज्ञिक गतिविधिमा अन्तर्राष्ट्रिय नेपाली साहित्य समाज (अनेसास) को योगदानसमेत स्मरण गर्नुभयो।

उप–प्राध्यापक गीताकुमारी पौडेलले सजुले कृति भित्रका ७१ गीतलाई २७ वटा प्रेम, २८ वटा विछोड तथा पीडा र १६ वटा गीतलाई विविध भावमा विभाजन गरेर कृतिलाई उत्कृष्ट बनाउन खोजेको बताउनुभयो। स्रष्टालाई मनन गर्न नसक्ने टिप्पणीको अर्थ नहुने धारणा राख्दै उपप्राध्यापक पौडेलले सजुलाई समाजमा व्याप्त पितृसत्तात्मक प्रवृत्तिलाई नियत ठान्ने यथास्थितिवादी स्रष्टाकारूपमा पनि चित्रण गर्नुभयो।

विभागीय सदस्य डा. श्रीधर न्यौपानेले स्नातकोत्तर नेपाली छात्रा सजु असल स्रष्टाका रूपमा विभागले पाएको धारणा राख्नुभयो। कृतिका सम्पादक रमेश दाहालले स्रष्टा सजु पौडेल बराललाई स्रष्टा सम्मान गर्नुभएको थियो भने सजुका सिर्जनालाई त्रुटिरहित बनाउन आफ्नातर्फबाट सम्पादनमा कुनै कसर बाँकी नरहेको बताउनुभएको थियो

विभागीय प्रमुख डा। यमनाथ तिमिल्सिनाले सजुले शिक्षाको सेवा गरेर सन्तानको जन्मदिन मनाएकामा आभार व्यक्त गर्दै आगामी दिनमा सिर्जना यात्रामा भावसँगै व्यञ्जना शक्तितर्फ ध्यान दिन सुझाव दिनुभयो।

गीतकार सजुले परदेश पुगेपछि बल्ल देशको महत्त्वबोध हुने बताउनुभयो। उहाँले भन्नुभयो ‘परदेशमा व्यथा पोख्ने जिम्मेवार माध्यम भनेकै कलम बन्छ।’ विदेश पुगेपछिका जिम्मेवारी एकातर्फ, अर्कोतर्फ परिवारसँगको वियोग र मातृशक्ति हुनुको पीडालाई मलम लगाउने माध्यम कलमलाई बनाउँदा सञ्जालले पनि उत्साह थप्ने गरेको सजुले बताउनुभयो। आफ्नो गीतियात्राबारे आमाले गाउँ समाजमा विभिन्न सन्दर्भमा गाएका गीत सुनेर लेखनयात्रा थालेको बताउँदै गीत लेखनको पथपदर्शक र गुरुसमेत आमा भएको बताउनुभयो।

विभागप्रति धन्यवाद ज्ञापन गर्दै उहाँले भन्ननुभयो, ‘कृति लोकार्पणको जिम्मेवारी लिएर विभागले लेख्ने काममा प्रेरणा थपेको छ।’ सोही समारोहबीच स्रष्टा सजुले विभागीय पुस्तकालयमा आवश्यक २८ हजार बराबरका पुस्तक हस्तान्तरण गरेर छोरा सजीव बरालको नवौँ जन्मदिनसमेत मनाउनुभएको थियो। स्रष्टाकी आमा नारायणी पौडेल, कृतिका प्रकाशक राजीव बरालले संयुक्त रूपमा उक्त कृति विभागलाई हस्तान्तरण गर्नुभएको थियो।

त्यसैगरी लोकार्पित कृतिका सम्पादक तथा अनेसास दर्पणका कार्यकारी सम्पादक रमेश दाहालले आफूले सम्पादन एवं मुद्रण गरेका फरक(फरक विधाका तीन दर्जनभन्दा बढी कृतिहरू पिएन क्याम्पस पुस्तकालयलाई हस्तान्तरण गर्नुभएका थियो। जसमा वरिष्ठ साहित्यकार खेमनाथ दाहाल, होमनाथ सुवेदी, विश्व कीर्तिमानी डा. डीआर उपाध्याय, लेखनाथ पोखरेल, विमला निरौला, शकुन ज्ञवाली, लक्ष्मी श्रेष्ठ, माया गुरूङ, हरिप्रसाद काफ्लेलगायत दर्जनौँ साहित्यकारद्वारा लेखिएका कृतिहरू रहेका छन्।

विभागीय सदस्य निर्मल सापकोटाले पुस्तकको मूल्य भए तापनि ज्ञानको मूल्य नहुने भएकाले स्रष्टा सजु तथा सम्पादक रमेश दाहालबाट प्राप्त पुस्तकहरूबाट विद्यार्थीले पर्याप्त लाभ लिने विश्वास व्यक्त गर्नुभयो।

समारोहबीच आयोजककातर्फबाट अतिथि, समीक्षक, सम्पादक तथा पत्रकारलाई मायाको चिनोसमेत प्रदान गरिएको थियो।

प्रकाशित मिति: मंगलबार, मंसिर १०, २०८२ १६:१८

प्रतिक्रिया दिनुहोस्