आज साउनको पहिलो सोमबार :देशभरका शिवालयमा भक्तजनको भीड

समाज

गृहपृष्ठ
समाज

आज साउनको पहिलो सोमबार :देशभरका शिवालयमा भक्तजनको भीड

सामाजिक सञ्चार सोमबार, साउन ५, २०८२

काठमाडौँ : आज साउन महिनाको पहिलो सोमबार, हिन्दु धर्मावलम्बीहरूका लागि विशेष धार्मिक महत्त्वको दिन रहेको छ। बिहानैदेखि काठमाडौँस्थित पशुपतिनाथ मन्दिरसहित देशभरका प्रमुख शिवालयहरूमा श्रद्धालु भक्तजनहरूको घुइँचो लागेको छ।

श्रावण महिनालाई भगवान् शिवको प्रिय महिना मानिन्छ भने सोमबारलाई शिवजीको प्रिय वारका रूपमा पूजिन्छ। यही कारणले आजको दिन विशेष महत्व राख्दछ। हिन्दु धर्ममा आस्था राख्ने श्रद्धालुहरू विशेषगरी सोमबार निराहार व्रत बस्ने, शिवलिंगमा जल अर्पण गर्ने र शिवजीको पूजा–अर्चनामा सहभागी हुने परम्परा रहेको छ।

आजका दिन शिवलिंगमा जल चढाउने, बेलपत्र अर्पण गर्ने, ‘ॐ नमः शिवाय’ मन्त्रको १०८ पटक जप गर्ने र रुद्राक्षको माला प्रयोग गर्ने पूजा विधिहरूलाई विशेष रूपमा मानिन्छ। खासगरी महिलाहरू हरियो पोशाक, चुरा र मेहन्दी लगाएर शिव–पार्वतीको पूजा गर्दै साउन सोमबारको व्रत बस्ने गर्दछन्।

यो व्रत विवाहित महिलाहरूले वैवाहिक जीवन सुखमय होस् भन्ने कामनाका साथ बस्ने चलन छ भने अविवाहित महिलाहरूले राम्राे जीवनसाथी प्राप्त होस् भन्ने उद्देश्यले श्रद्धापूर्वक पूजा गर्ने गर्दछन्। साउन सोमबारको व्रतले भक्तजनको मनोकांक्षा पूरा गर्ने, शान्ति र समृद्धि दिलाउने विश्वास गरिन्छ।

प्रकाशित मिति: बिहीबार, पुस १७, २०२६

प्रतिक्रिया दिनुहोस्