भियतनाममा आँधीका कारण बाढी, पाँच जनाको मृत्यु, दुई बेपत्ता

अन्तर्राष्ट्रिय

गृहपृष्ठ
अन्तर्राष्ट्रिय

भियतनाममा आँधीका कारण बाढी, पाँच जनाको मृत्यु, दुई बेपत्ता

सामाजिक सञ्चार आइतबार, असार १, २०८२

हनोई, १ असार

(रासस/एएफपी)
मध्य भियतनाममा आएको आँधीबेहरी र वर्षाले पाँच जनाको मृत्यु र दुई अन्यलाई बेपत्ता बनाएको आधिकारिक तथ्याङ्कले जनाएको छ। आँधीका कारण त्यहाँ मुसलधारे वर्षाले विशाल कृषि क्षेत्र डुबानमा परेको छ।

शनिबार टाइफुन वुटिप एक सय २८ किलोमिटर (८० माइल) प्रतिघण्टासम्मको हावाको गतिका साथ दक्षिणी चीनमा पुगेको थियो र भियतनामको छेउमा रहेको टोन्किन खाडीमा फैलिएपछि उष्णकटिबन्धीय आँधीमा परिणत भएको थियो।

भियतनामको कृषि मन्त्रालयले शनिबार साँझ मध्य क्वाङ त्री प्रान्तमा तीन जनाको मृत्यु भएको र क्वाङ बिन्ह प्रान्तमा दुई अन्यको मृत्यु र दुई जना बेपत्ता भएको बताएको छ।

सत्तरी हजार हेक्टरभन्दा बढी (एक लाख ७२ हजार एकड) बालीनाली डुबानमा परेको मन्त्रालयले जनाएको छ।

चिनियाँ अधिकारीहरूले दक्षिणी हाइनान टापुमा हजारौँ मानिसलाई सुरक्षित स्थानमा सारेका थिए भने स्कूलहरू बन्द गरेका थिए र आँधी आउनुअघि शुक्रबार रेल सेवा रोकेका थिए।

यद्यपि संयुक्त टाइफुन चेतावनी केन्द्रले शनिबार आँधी ‘सप्ताहन्तको अन्त्यमा कमजोर भएर विलीन हुने’ पूर्वानुमान गरेको छ।

जलवायु परिवर्तनको परिणामस्वरूप प्राकृतिक प्रकोपहरू बढी गम्भीर र बारम्बार हुँदै गएका छन्। कृषि मन्त्रालयका अनुसार गत वर्ष भियतनाममा यसले पाँच सय १४ जनाको ज्यान लिएको थियो। यो सन् २०२३ को तुलनामा तीन गुणा बढी हो।

गत सेप्टेम्बरमा उत्तरी भियतनाममा आएको टाइफुन यागीले तीन सय ४५ जनाको ज्यान लिएको थियो भने तीन अर्ब ३० करोड डलरको आर्थिक क्षति भएको थियो।

प्रकाशित मिति: आइतबार, असार १, २०८२ १७:०५

प्रतिक्रिया दिनुहोस्